Page 213 [213]
ea quae natura in promptu haberet nostrae mentis aciem, sicut ad solem
noctuae oculos caligare. Procul haec a nobis insania sit, ut quantum
absimus adhuc, non dico a summis, sed vel a mediocribus viris ignoremus.
Assentatiunculis autem quorundam aut item obtrectatiunculis, et ineptis
et levibus, non magis equidem aut attolor aut deprimor quam umbra ipsa
mei corporis. Non enim quia longior illa et extentior mane ac vesperi sit,
meridie vero brevior et contractior, ob id ego quoque statim maior pro¬
ceriorque mihi mane ac vesperi quam meridie ipso videri debeo.
4. Quod autem fore suspicaris opera, studio industriaque mea ut et
vetustati squalor abstergatur et ad frugem iuniores perveniant, vide,
quaeso, ne tibi verba det amor erga me nimius. Ego certe (nescio autem
vitione mentis captus, an consilio magis adductus) magnum quiddam
omnino molior facturusque operae pretium videor, modo vires, animum
subsequantur.
Vale.
Faesulae, ante VII Calendas Septemb. MCCCCLXXXXI
211