Page 143 [143]
OCR
Oremus Immensam clementiam tuam omnipotens aeterne Deus humiliter imploramus, ut hanc creaturam salis, quam in usum generis humani tribuisti, benedicere + et sanctificare + tua pietate digneris: ut sit omnibus sumentibus salus mentis et corporis; et quidquid ex eo tactum vel respersum fuerit, careat omni immunditia, omnique impugnatione spiritualis nequitiae. Per Christum dominum nostrum. Resp. Amen. Exorcismus aquae Exorcizo te creatura aquae, in nomine Dei + Patris omnipotentis, et in nomine Jesu + Christi Filii ejus domini nostri, et in virtute Spiritus + Sancti: ut fias aqua exorcizata ad effugandam omnem potestatem inimici, et ipsum inimicum eradicare et explantare valeas cum angelis suis apostaticis. Per virtutem ejusdem domini nostri Jesu Christi, qui venturus est judicare vivos et mortuos, et saeculum per ignem. Resp. Amen. Oremus Deus, qui ad salutem humani generis maxima quaeque sacramenta in aquarum substantia condidisti: adesto propitius invocationibus nostris; et elemento huic multimodis purificationibus praeparato, virtutem tuae benedictionis + infunde: ut creatura tua mysteriis tuis serviens, ad abigendos daemones, morbosque pellendos, divinae gratiae sumat effectum; ut quidquid in domibus, vel in locis fidelium haec unda resperserit, careat omni immunditia, liberetur a noxa; non illic resideat spiritus pestilens, non aura corrumpens; discedant omnes insidiae latentis inimici; et si quid est, quod aut incolumitati habitantium invidet aut quieti, aspersione hujus aquae effugiat; ut salubritas per invocationem sancti tui nominis expetita ab omnibus sit impugnationibus defensa. Per dominum nostrum etc. Hic mittat sal in aquam modum crucis, dicendo semel: Commixtio salis et aquae pariter fiat: In nomine Patris +, et Filii + et Spiritus + Sancti. Resp. Amen. V. Dominus vobiscum. R. Et cum spiritu tuo. 142
